លិខិតសូមខមាទោសចំពោះព្រះគ្រូញាណវិរិយោ គង់-ឆន

លោកឪពុក ញាណវិរិយោ គង់-ឆន

លិខិតសូមខមាទោស

ពីកូន ឡុង-ឬទ្ធី (ហៅរស់)បច្ចុប្បន្នជាព្រះគ្រូចៅអធិការ វត្តព្រះពុទ្ធ ដែលស្ថិនៅទីក្រុង ហ្វីនិច រដ្ឋអារីហ្សូណា សហរដ្ឋ អាមេរិក ។

កូនសូមក្រាបថ្វាយបង្គំព្រះសពលោកឪពុកដោយក្តីគោរពស្រលាញ់ស្មើដោយជីវិត !

កូនសូមចំរើនពរមកអ្នកម្តាយ ដោយក្តីគោរពស្រលាញ់ស្មើដោយជីវិត !

អស់រយៈកាលជិត៥ឆ្នាំដែលរូបកូនបានឃ្លាតចាកស្រុកកំណើត ដ៏ជាទីស្រលាញ់ និង នឹករព្ញកបំផុត ។លោកអ្នកមានគុណទាំងពីរ ក៏បានអនិច្ចធម្ម និង ស្លាប់ ទៅចោលកូនផងដែរ ដោយបន្សល់ទុកឲ្យកូននូវរងីរងារ កំព្រាឯកា។ អត់ពីលោកឪពុកនិងអ្នកម្តាយទៅ កូនពិតជាមាន ចិត្តតក់ស្លុតរន្ធត់ខ្លាំងណាស់ ចំពោះការបាត់បង់នូវលោកអ្នកមានគុណទាំងពីរ ក៏ប៉ុន្តែកូនពិតជា សំណាងណាស់ ដែលកូនបានកើតមកជាមួយនឹងអ្នកមានគុណទាំងពីរ កូនបានជ្រកក្រោមម្លប់ ដ៏ត្រជាក់ ពីសំណាក់អ្នកមានគុណ កូនបានរស់រានមានជីវិត មកដល់សព្វថ្ងៃនេះគ៏ដោយសារ លោកអ្នកមានគុណទាំងពីរ ចិញ្ចឹមបីបាច់ថែរក្សា សាច់ឈាមរបស់កូនគឺជាសាច់ឈាម របស់លោកឪពុកនិងអ្នកម្តាយ ។ សូមលោកអ្នកមានគុណញញឹមនិងសង្ឃឹមទុកចុះថា កូននៅតែជា កូនដ៏ល្អរបស់អ្នកមានគុណជានិច្ច បើទោះបីជាអ្នកមានគុណអនិច្ចធម្មទៅចោលកូនក៏ដោយ នេះជាច្បាប់ធម្មជាតិ កើត ចាស់ ឈឺ ស្លាប់ ពុំនរណាម្នាក់ជៀសរួចទេ ទាំងរូបកូនក៏គង់តែក្លាយ ជាផេះផង់ នៅលើផែនដីនេះ ពេលណាមួយមិនខាន ដូចជាលោកឪពុកនិងអ្នកម្តាយអញ្ចឹងដែរ ។

កាលដែលកូនមិនបានមកធ្វើបុណ្យដោយផ្ទាល់នេះ ក៏អាស្រ័យដោយកូនមិនអាចមកបាន។ សូមលោកអ្នកមានគុណអភ័យទោសឲ្យកូនផង ។

មួយវិញទៀតចំពោះការធ្វើបុណ្យ ប្រគេនលោក ឪពុក បើមិនបានសមរម្យឬពេញព្រះទ័យ យ៉ាងណា សូមលោកឪពុកមេត្តាអនុគ្រោះ អភ័យទោសឲ្យកូន ត្បិតអីកូនពុំបានទទួលសំបុត្រ ផ្តាំផ្ញើរណាមួយទេ កូនគ្រាន់តែដឹងដំណឹងថា លោកឪពុក ខ្សោយ គឺលោកឪពុកនិយាយថា ហេវខ្លាំងណាស់ កូនពុំនឹកស្មានថា លោកឪពុកបញ្ចប់ជីវិត ដោយព្រះអង្គឯងសោះ កូនពិតជា មិនអស់ចិត្តទេ ពីព្រោះកូនមើលព្យាបាល មិនទាន់អស់ចិត្តផង ។

កូនសូមឲ្យលោកឪពុកមកពន្យល់សប្តិដំណឹងដល់កូន នៅពេលណាមួយក៏បាន ថាតើរឿងរ៉ាវហ្នឹង ដូចម្តេចខ្លះ ? បានជាលោកឪពុកដាច់ចិត្តទៅចោលកូនៗ និងចៅព្រមទាំងពុទ្ធបរិស័ទ ដែលគោរព ស្រលាញ់រាប់អាន លោកឪពុកដូច្នេះយ៉ាងនេះ សូមលោកឪពុកមកប្រាប់កូន ដើម្បីឲ្យកូនបាន ស្ងប់ចិត្តផង ។

កូនសូមជួបលោកឪពុកនិងអ្នកម្តាយគ្រាប់ៗជាតិ !

កូនសូមកើតជាតិណាៗ ឲ្យបាននៅជិតលោកឪពុកនិងអ្នកម្តាយកុំឲ្យដូចជាតិនេះទៀត !

កូនសូមប្តេជ្ញាថែរក្សាវង្សត្រកូលលោកឪពុកអ្នកម្តាយឲ្យបានស្ថិតស្ថេរយូរអង្វែងទៅ! កូនស្រលាញ់លោកឪពុកនិងអ្នកម្តាយជានិច្ច!

កូននឹករព្ញកដល់លោកឪពុកនិងអ្នម្តាយគ្រប់វិនាទី!

ជាថ្មីម្តងទៀតនៅចំពោះមុខព្រះសពកូនសូមអភ័យទោសនូវរាល់កំហុសឆ្គងទាំងឡាយ របស់កូនទាំងប៉ុន្មាន ដែលមានលើលោកអ្នកមានគុណទាំងពីរដោយចេតនាក្តីឬអចេតនាក្តី សូមលោកអ្នកមានគុណអភ័យទោសឲ្យកូនផងចុះ ។

ជាចុងបញ្ចប់ សូមឲ្យបដិសន្ធិព្រះវិញ្ញាណក្ខន្ធ របស់លោកឪពុកបានទៅចុតិបដិសន្ធិ ក្នុងសុគតិភព កុំបីឃ្លៀងឃ្លាតឡើយ ៕

ពីកូនសំឡាញ់របស់លោកឪពុក និងអ្នកម្តាយ !

វត្តព្រះពុទ្ធរដ្ឋអារីហ្សូណា សហរដ្ឋអាមេរិក ។

ថ្ងៃទី២៧ខែធ្នូ ឆ្នាំ២០១០